Э. А. Рязановлэсь «Жестокий романс» нимо киноужзэ учкыны ми эшъёсыным ог дас пол ке но ветлӥмы. Со потӥз вал Ижысь лулчеберетъя училищее пыреме бере. «Октябрь» кинотеатре но Ударнике олокӧня пол вуылӥмы (соос дышетскон юртмылы но огъяулоннимылы матын вал). Но палэнэ но — «Удмуртия» кинотеатре, центрысь «Дружбае» — мылмы потэ вылэм ветлыны. Нош огпол «визьмы» тырмиз «Италмасэ» но вуыны (Ижкарлэн мукет пумаз), — сокем быдӟым вылэм яратоно романсъёсынымы пумиськеммы!
Романсъёсын, — шуисько. Малы ке шуоно, нырысь ик Валентина Пономаревалэн куараезлы луыса, Андрей Петровлэн кылбурчиослэсь кылъёссэс чебересь крезьгуръёс пыр выльысь чузъятэмезлы луыса мон ветлӥ со киное. Нош огъя верано ке, ачиз фильм но, режиссёрлэн ужез но, артисъёслэн шудэмзы но синмаськымон вал ук (быдэс дунне, шуыны луэ, синмаськиз та кинолы), критикатэк ӧз ортчы ке но (ваньмызлы быдэсак кельшыны уг луы).
Ю. Разина. Перевод песни на удмуртский язык
Небыт пледэн шобыртӥсько но…
Небыт пледэн шобыртӥсько но
Толло вӧтме тодам ваё.
Но мар со вал – кин ке вормиз-а?
Вормиз ке – кин но ку вал со?
Мон выльысь ваньзэ малпасько но
Сюлмы шуген курадӟисько.
Яратон вал яке ӧй вал-а?
Кылы кулэ-а вал – ӧй вал-а?
Ӧй вала мон…
Кин пӧйшурась, нош кин пӧйшур вал?
Мыдлань ваньмыз – ваньмыз мыдлань…
Сибыр коӵыш мыргетонъяз нош
Мае валаз, мае валаз?
Ог-огмылэсь визьмес сынам но,
Кинлэн кияз кин вал шудон?
Сюлэммы кудмылэн – тынад-о,
Лобӟем сямен ворттӥз, – мынам-о
Кин вал шудон?
Но мар со вал, мар-о, мар вал со?
Мае лэзем уг поты – жаль…
Вормид-а тон – яке ачим-а?
Вормид-а тон – яке ачим-а?
Уг лу валан, уг лу валан…
2017.
Ю. Разина. Небыт пледэн шобыртӥсько но… берыктэмын ӟуч кылысь
Марина Цветаева. Под лаской плюшевого пледа… Оригинал текста:
«Под лаской плюшевого пледа…»
Туж кильтро мадёсъёс ветло та кылбур котырын. Шонергес верано ке, Марина Цветаева котырын. 1914 аре, кылбурзэ кылдытыкуз, Марина Ивановна улэм эшеныз — Софья Парнокен (со но кылбурчи). «Подруга» нимаське быдэс циклэз, кытчы пыре таиз кылбур но. Оло, огшоры семьяен улыны луымтэенызы-а, кусыпъёссы зэмзэ но эсэптэмесь вылэм, оло тодмо нимо адямиослы дан поттон понна озьы кыл вӧлдо-а? — кин тодэ…
Мынам валамея, та чуръёсын кылбурчи гожтыны быгатэ вал кузпалэз сярысь но — со кемалась ик ӧвӧл кошкемын со дорысь: сюлмыз бӧрдэ но валэктон утча, мар со вал — валэктыны сётскисьтэм яратон яке нылпи понна огазеяськон…
Ярам, Софья Парнокез берло но кушиллям, шуо, нылкышноосын ямтэм кусыпъёс воземез понна. Луыны быгатэ, иське, солэн Марина борды ериськыны выремез. Но мынам йырам малы ке но уг тэры, Марина сётскиз шуыса. Кырӟанъя ке, со луыны быгатэ вал огпол нюръяськемзы: огез басьтыны выре, мукетыз уг сётскы (Марина чупрес сямо, визьмо мурт — кызьы шуак сётскыны быгатысал маке ӧвӧл солы?!). Малпалэ ай, асьтэлэсь егит дырдэс: кин но уг тэбиньы егит нылаш борды — огез ӟеч мылкыдын, мукетыз урод малпанэн… Кызьы нылмурт ассэ пуктоз, кыӵе луонлык возьматоз — озьы ик луоз… Нош супыльтонъёс котьку огкадь паньсасько: азьло но, туэ но.
© Ю. Июль. Небыт пледэн шобыртӥсько но… 2017 // УДМУРТ КЫЛЫН ӞУЧ КЫРӞАН русские песни на удм.яз.
