Кызь тямыс аресозяз гинэ улэмын Михаил Юрьевич Лермонтов. Туж паймоно кадь узыр, адямилыко солэн творчествоез но, ачиз но. «Ангелзэ» со гожтэм 17 аресказ (1831 арын). Егитъёс со вакытэ выжыкыллы оскемысь дугдо ни, нош со Кылчин дуннеез ӵапак соку сюлмыныз но, йырсазез пыр но валаны тыршем. Нош печате потэм та кылбур 1839 аре гинэ, Одессаын «Одесский альманах на 1840 год» нимо изданиын.
© Перевод на удмуртский язык Юлии Разиной
Оригинал: Михаил Лермонтов. Ангел
Кылчин
Удмурт кылэ берыктӥз Ю. Разина
Уйшор инметӥ, шыпыт-шып кырӟаса,
Лобе вал кылчин, нош солэсь
Лулгур кырӟанзэ улӥзы кылзыса
Пилем, кизили но толэзь.
Кырӟаз со райысь сьӧлыктэм лулъёслэсь
Садын куаныса улэмзэс:
Одӥг но ӧз пӧяськы со, кырӟакуз,
Быдӟым Инмарез ушъякуз.
Озьы гадь бордаз выль лулэз со ваиз
Бӧрдон, кайгырон дуннее.
Егит лул пушкын пыраклы ик кылиз
Кырӟась кылчинлэн куараез.
Уно кайгуос пыр потӥз егит лул,
Дарто мылкыдзэ уёнъяз,
Но ноку инмысь кадь чебер лулгурез
Ӧз кылы ни, – улытозяз.
2012.
© Юлия Разина: берыктэмын ӟуч кылысь
Критик В. Г. Белинский «Отечественные записки» журналын лек мылкыдын дунъям та кылбурез. Соин, лэся, кылбурчилэн нырысетӥ бичетаз (1840-тӥ арын) та кылбур пырытэк кылем. Нош ӵапак та кылбур ик 1917-тӥ арозь ваньмаз солэн мукет изданиосаз нырысетӥ интыын сылэм. Тӥни кыӵе пӧртэм сямен дунъяны выро Инмар, Кылчин, Сопал дуннелы оскись муртэ…
© Юлия Разина. «Угадайка», или Прочтение М.Лермонтова в удмуртских переводах
