Ӟуч эшъёсылэсь удмурт кылэ берыктэмъёсме куке но одӥг бичетэн поттэме луоз шуыса осконэ ӧй вал ни, Интернетын ке но сайт кылдытыса потто ай шуыса буйгатъяй асме. Нош югдур кылдӥз: Игралась газет редакциын, «Светлый путьлэн» «Вакыт» нимо приложенияз куиньзэ поттӥзы, со — Анна Черно, Василий Муратовский но Максим Печерник.
Улӥынгес — со учыр сярысь.
© Перевод на удмуртский язык Юлии Разиной
Анна Черно. Про объятье
© Оригинал текста Анны Черно на русском языке:
Ӟыгырскон сярысь
Лирика
Удмурт кылэ берыктӥз Ю. Разина
1.
Тулыс куазен тулыс мыным уг тырмы,
Мушез сяськаосы вылын – ӧжыт,
Мар ке выльысь кутскын – уг сузь мылкыд,
Нош быдэстэм ужлэсь чик кӧт уг тыры,
Уг тырмы час вылам пусэз гинэ но,
Чечы но малы ке шӧмтэм потэ,
Ӟыгыртӥськон но кулэсгес йӧтэ…
Ӧжыт мон потӥсько – аслым ачим но.
2.
Нимыз понна ӟыгырскытозь –
Кулэ ӧвӧл иське,
Ӟызы, начар дэрем угось дӥсян –
Серем, пась ке –
Кесиськемез солэн уз ват
Гадьдэ но пыдъёстэ,
Нош мылкыдтэк ӟыгыртӥсьлэсь
Мозмытӥськем потэ.
Куке дэрем мон кышъясько,
Вурыс – бӧрсьысь бӧрсе, –
Гадь бордам сокем ӝиптӥсько –
Суйы лосыр! вазе.
2021 г.
© Юлия Разина: берыктэмын ӟуч кылысь
© Газета «Светлый путь», приложение «Вакыт», 24. 01. 2025.
2025-тӥ арлэн нырысетӥ шутэтскон нуналъёсаз мон вунонтэм пумиськонэ вуылӥ — Удмурт Элькунмылэн Игра ёросысьтыз Зура черкогуртэ. Со пумиськонэз радъязы: Удмуртиысь калык артистка Надежда Уткина но Кедра Митрей нимо ёрос премилэн лауреатэз Диана Шкляева.
Трос гинэ эшъёсмы ӧтчамын вал отын:
- Удмурт Элькунысь лулчеберет удысысь дано ужась Татьяна Чернова,
- крезьчиос, кырӟасьёс Лия но Дмитрий Лекомцевъёс,
- тодмо кылбурчи но журналист Светлана Поторочина,
- «Удмурт кенешлэн» Эгра ёзэныз кивалтӥсь Ольга Соловьёва,
- Эгра ёросысь гожъяськисьёс Надежда Владыкина, Алексей Данилов,
- кузпалъёс Галина но Леонид Лекомцевьёс,
со сяна — трос мукет адӟиськыны лыктэм эшъёс но тодмоос.
Та ужрад уз вуны тани марлы луыса но. «Светлый путь» нимо ёрос газетлэн «Вакыт» нимо приложенияз толшорлэн номераз печатлазы со пумиськонэ вуылэм куинезлэсь кылбурчиослэсь ужъёссэс. Со чотэ пыризы мынам Стихи.ру сайт пыр тодмо ӟуч эшъёсылэсь удмурт кылэ берыктэмъёсы но. Ӵапак огез тӥни — Анна Чернолэнэз — таяз вотэсбамын.
