Капчи учкемен лӥятӥсь, сюлэмез небӟытӥсь но шумпотон кузьмась пальпотон, куректонэз кулэстӥсь я уллясь шуныт кыл — кыӵе уг тырмы со куддыръя адямилы… Со сярысь Алма-Атаысь кылбурчи Василий Муратовский гожтэ аслаз чуръёсаз: «Как не хватает человеческих улыбок…»
© Перевод на удмуртский язык Юлии Разиной
Макем уг тырмо пальпотӥсь синъёс…
Гражданская лирика
Макем уг тырмо пальпотӥсь синъёс…
Небыт кылъёс, мылкыд сётӥсь муртъёс, –
Адямилы сотэк нюркыт сюрес.
Соку быдэс улон адӟод одӥг уез…
Нош кайгулэн сыӵе ик-а кужмыз,
Кызьы сое суредало ӵемысь?
Вазиськон кыл люка ке эшъёсыз,
Туж сэзь сылме кайгу сюлэм шунытъёслэсь.
Йыбырскисько мон соослы, кин ке
Кыдёкысен кылэ вазиськемез,
Лыктэ, кылчин, со – Инмарлэн ӟечез, –
Лекез лякыт пазьге ӟеч сямыныз валче…
2021.
© Берыктэмын ӟуч кылысь: Юлия Разина
Та кылбур тани кыӵе тема пала валтӥз ай монэ… Пӧртэм калыкъёс пӧртэм сяменгес валало, кыӵе луыны кулэ ӟеч адями. Со дыре ик — пӧртэмгес ке но — ваньзы дунъяло визьмо, тазалыко, ужась, зэмлыко, кышкасьтэм, бадӟым сюлэмо, сюлмаськись, вылтӥяськисьтэм адямиез. Кылсярысь:
- «добрый молодец», — шуо ӟучъёс — нырысетӥ интые адямилэсь ӟеч луон сямзэ поттыса;
- коми-пермяк дунъя тупаса улыку ваньзэ быгатӥсь, нош ожмаськонлы котьку дась луись муртъёсыз (кужмын гинэ ӧвӧл, тушмондэ вормон понна кескич визьмыд но медло);
- чувашъёс сизьым ӟечлыко курон пукто ӟеч луон понна. Озьыен, луыны кулэ: ужез яратӥсь, тазалыко, визьмо, эшлыко, ӟечлыко, шектэм, зэмлыко, нош бурятъёслэн, калмыкъёслэн но монголъёслэн со выллемесь ик куронъёссы — укмыс;
- гурезьёсын улӥсь грузин котькуд ласянь удалтэм адями луоно: таза, сӥлё-виро, чырткем, пӧсез но, кезьытэз но чидась, ужаны но, ожмаськыны но дась;
- Дагестанын улӥсьёслэн валамзыя, вылӥ курон ӟеч адями понна — Атыкай дорез, Атыкай музъемез яратон;
- «зэмос адями» шуо ушъямон адямиоссэс Чукоткаын но отӥ артэ уйпалан улӥсь калыкъёс;
- ӟеч хакас луыны кулэ адямилыко, зэмлыко, ачык, сайкыт визьмо, юн мылкыдо, азьлане оскыса вамышъясь, ужез яратӥсь, аслад калыкед понна сюласькись;
- ӟеч еврей луыны кулэ югыт дуннеез Кылдытӥсез гажась, начар улӥсьёсыз, куанер адямиосыз жалясь, чидась, валась;
- индеецъёс, ваньзэ тае сяна, дунъяло на мултэс кыл поттасьтэм муртэ: сотэк улон уг азинскы ке, туж кулэ дыръя гинэ вераськыны быгатэ ӟеч, йӧно, визьмо, кужмо батыр-индеец;
- Китайын витьлы люко адямилыко карись куронъёссэс: Конфуцийлэн дышетэмезъя улон, семья, йылолоъёсъя улон (шулдыръяськонъёс но, сопал дуннее кошкемъёсыз буре ваёнъёс но), визьмо тыро сиён-юон, кусыпъёсыз чаклась но огедлы огед пайда сётыны быгатӥсь;
- нош казах кыӵе луыны кулэ? — выль тодонъёслы дась, лулпуш дуннедэ азинтӥсь, политикаез валась, кӧня ке кылэз тодтӥсь (соос пӧлын одно ик анай кыл но медло), чырткем, чидась, пырисез куно карыны дась, семьязэ утьыны быгатӥсь.
Пӧртэм шат удмурт адямилэн идеалэз?
В. Муратовскийлэн кылбурез «Как не хватает человеческих улыбок…» печатламын Стихи точка ру вотэсбамын.
