Н. Заболоцкий. Адями тусъёслэн чеберзы сярысь

Николай Алексеевич Заболоцкийлэн тужгес но тодмо кылбурез. Гожтэм со сое ссылкаысь бертэмез бере, 1955 арын. Антитеза амал пыр кылбурчи возьматэ тусъёслэсь пӧртэмзэс, кызьы адямилэн лулпуш улонэз быгатэ чебертыны бездыт тусэз но.

Table of Contents

© Юлия Разина. Перевод на удмуртский язык

© Николай Заболоцкий. О красоте человеческих лиц

Адями тусъёслэн чеберзы сярысь

Удмурт кылэ берыктӥз Ю. Разина

Узыр порталлы но, гидлы укшасез но,
Инбам кадь чылкыт но, дэри кадь кыжмем но
Луо ымныръёс: шоголесь, кильтроесь,
Луо тусбуйёс: уродэсь, шӧтэмесь.

Сыӵе куд-огез: виртэммем, лултэммем кадь,
Ымныр интые мускыт нюр я четлык кадь;
Шимес юртъерен ӵошатод мукетсэ,
Отысь тон уд шедьты ватскем кузёзэ.

Нош мон туж пичи коркаез тодылӥ вал.
Узыр но ӧй вал со, со туж огшоры вал.
Озьы ке но, со коркалэн пушкысьтыз
Шорам тулыслэн югытэз пиштылӥз.

Быдӟым, синпӧртмась дуннемы та – чынзэ ик!
Луо ымныръёс жингыртӥсь кырӟан кадь ик.
Шунды кадь пиштӥсь, паймымон гуръёслэсь
Вордске, дыр, ӝужыт инбамлэн кырӟанэз!

2001.

Н. А. Заболоцкийлэн малпамезъя, адямилэн ымныраз гожтэмын ваньмыз — сямыз, визьмыз, йылолъёсыз, быдэс улон сюресэз. Сое уд ваты, со кыре потэ выросъёсысь, сюлэмлэн тулкымъяськемысьтыз — ваньзэ сое лыдӟыны быгатыны гинэ кулэ. Дышетӥсьлэн пиез, Москва университетлэн медициная факультетаз дышетскем, Ленинградысь (соку со Петроград но нимаське на вал) Герцен нимо Пединститутэз быдэстэм мурт, со вала адямилэсь психологизэ, лулсэр улонзэ.

Но таӵе мур философие со вуэ бер творчествояз ини (берло ачиз курла аслэсьтыз азьвыл гожъямъёссэ). Куинетӥ классысен ини ас киыныз лэсьтэм, аслаз кылбуръёсыныз тырмытэм журналъёс потта вылэм со. Революция бере огыр-бугыр улон-вылон питырскемъя, поэзиын со вакытэ туж трос течениос вал, кылбурчиос асьсэлэсь улонэз валанзэс шараяло пӧртэм жанръёсын. Озьы, Николай Алексеевич гожъяське гротескен, сатираен, пародиен но выре. 1927-тӥ арысен пото ини зэмос усто, юн малпаськонэ выжтӥсь кылбуръёсыз.