Таяз вотэсбамын вераськоме кылысь кылэ берыктэм, туала но зэмос удмурт кырӟан сярысь. Огез — мукет калыклэсь асьме кылын кырӟаса «асэстэм» карон, мукетъёсыз — мукет калыкъёслэсь пӧртэменызы син азе потон.
Дунневыл берыктэм кырӟанъёс
Пӧртэм дунъет сётыны луэ мукет кылысь мукетаз берыктэм кырӟанъёслы. «Йӧскалыклэсь лулчеберетсэ уг луы узырмытыны мурт культуралэн узырлыкеныз», — шуоз кин ке, — озьы со уг узырмы, озьы со — сураське. Вашкалазэ ыштыны уг яра, «аутентичной» шуонэныз данъяськыны кулэ, нокинлы но кельшисьтэменыз».
Туж тумошо, туж маскара но туж кышкыт кылӥське, озьы шуиськод ке: «Нокинлы но кельшисьтэм».
Утчасько мукет сямен валэктыны — «укшасьтэм», «ярантэм»… Озьы но, тазьы но — огез йӧскалык мукетэзлы тупасьтэм луыса потэ. Татчы тупа «висъясь», «висъяськись» кылъёс. Только соос но висъясь, люкись валанъёс.
Нош берыктэм кырӟанъёс — лулчеберетъёсыз огазеясь югдур. Огеныз огзэ тодмато. Матысьгес каро. Эшъяло. Тани кӧня ке гинэ дуннее вӧлмем кырӟанъёс:
- «Аве Мария» молитваез 150-лэсь уно кылъёсын кырӟало;
- Мишель Телолэн (Бразилия) — «Если бы я поймал тебя» («Ai Se Eu Te Pego») — 131 кылын;
- Битлзлэн (Великобритания) — «Йэстэдэй» («Yesterday») — 108 кылын;
- Россиысь «Руки вверх» группалэсь но «Песенка» кырӟанзэ («La La La La La») уно кылъёсы берыктэмын: Германиын, Австриын, Швейцариын, Британиын но Америкаын…
- Консуэло Веласкеслэн (Мексика, 1941) — «Бэсамэ Мучо» («Besame Mucho») кырӟанэзъя 700 котыр кавер кырӟало ни:
Берыктон — лулчеберетлэн огез ёзэз
Шонер, вашкалазэ ыштыны уг яра. Нош малы туалаоссэ кылысь кылэ берыкъян уж сьӧлык луыны кулэ, пе? «Озьы лулчеберет уг узырмы — озьы сураське?» Таиныз соглаш луэме уг поты. Асьме бордысен кутскемын ӧвӧл та уж. Берыктон — лулчеберетлэн огез ёзэз.
Калыкъёс будо, йыло, выльмытско, куное ветло, бускельёсынызы эшъясько, вузкаро, вошъясько — узырмо но, начармо но — соизтэк но ӧвӧл… Улон со. Ог-огзэс валан понна кылэз дышето, ог-огзылэсь визькылзэс эскеро, ог-огзылэсь тамаксэс веръяло, ӵош кырӟаны выро. Кин выль кен вае — лушкаса яке кураса. Азьло но озьы вылэм, али но.
Палэнысь лыктэм выль кен аслэсьтыз кырӟанъёссэ, аслэсьтыз йылолъёссэ вунэтоз шат? Ноку но уз. Нырысь валатскоз, кыӵе йылолъёс валто выль интыын, собере ас семьяяз, нош бускельёсын тупамезъя — пумен пыӵатоз аслэсьтыз но сям-йылолъёссэ. Пичи ке но — одно озьы со луэ!
Быдӟым Атыкай ож дыръя Украинаысь Удмуртие эвакуациен вуэм адями кырӟатэк чидасалыз шат? Украин кылын кырӟамзэс мон ӧй кылылы, нош крезьгурзыя удмурт сямен туннэ ке но кырӟаськомы. Вашкала, аутентичной кожаса. Малпамтэ шорысь гинэ Муромын фестивальын тодмо луиз, кытысь вылэм со крезьгур, куке дорамы пересь мурт лыктыса вераз: «Со гурез мон кылӥ пичи дыръям ини, со милям кырӟанмы вал…»
Аутентично — со кызьы?
«Аутентично» — зэмос шуэм со. Вашкалаез лыдъяське — зэмос. «Аутентично» утиськем кырӟанъёсын тодмато ке но школаосын (кызьы вашкала дыръя чузъясько вылэм), программая дыр туж ӧжыт висъямын соослы. Нылпиослэн тодазы тысь уськытон понна гинэ. Нош будоз-а, выжы сётоз-а со отын яке соку ик вуноз-а, пашмоз-а — малпасез ӧвӧл ни. Малы ке шуоно, ичи лыдъем йӧскалыклэн лулчеберетэз уг быгаты конкурент луыны ӵемгес чузъяськись но адӟиськись котырысь дуннеослэн «узырлыкъёсынызы». Вӧлмоз-а со, уз-а — паськыт дуннее, сьӧрлось калыкъёс пӧлы — сое малпась но ӧй вал, лэся.
Удмурт кун университетлэн удмурт институтъёсаз но УрО РАН-лэн УИИЯЛ УдмФИЦ-езлэн программаосазы аутентичной культурамес утёнлы висъяло нимысьтыз саклык. Одӥг-ог — фольклор ансамбльёслэн но клубъёслэн ужрадъёсазы. Солэсь но ичигес ини — театръёсын. Но улонэ трос уг пыӵа со. Соин ик ужпумлэн но — бодылэн сямен ик — кык пумыз… Огласянь — туж кулэ со, но — быдэстыны, улонэ пыӵатыны малы ке — капчи ӧвӧл…
Эшшо но, «аутентично» шуыку, гажан но данъяськон мылкыд бугырскем сяна — сюлэм пыкиське: «со мынам ӧвӧл» шуэ кадь. Таизэ но валаны луэ. Куд-ог вашкала кырӟанъёс быдэс бигер шӧмо — чебересь ке но, соос трос ёросъёсысь удмуртъёслы мурт луо, валантэм. Дунневаланэз но туала адямилэн мукет: мукет ритм, мукет улонвалан валтэ сое. Нош «зэмос» вашкалазэ тодон кӧня ке муртлы гинэ кулэ: кыдёкысь дуно куно пумитан понна, образование басьтон но концертъёсын возьматъян понна гинэ яра.
Озьы луыса потэ, оло — янгышасько…
