Умой вылэм радъяны та физкультминуткаез видеоамалэн (интерактивно). Крезьгурен но/яке мультфильмен тупатыса. Куплетэз лыдӟыса яке кырӟаса, нодъясь яке анимациен лэсьтэм мунё/мунёос возьмато движениоссэ. Собере быдэс куплет крезьгур чузъяське нылпиос понна. Экранэ учкыса, соос но лэсьто озьы ик, мае возьматэ видео/эшсы.
«Султэ котыр, султэ ӝог»
мультфильм-физкультминутка @ идея
Султэ котыр, султэ ӝог,
Вакчиез кутске урок:
Шулдырез, серектӥсез —
Со уг возьма ӝегасез.
Со ӧте бызьылыны,
Со косэ вырӟылыны,
Сэзь луид ке, тод но ул —
Тон таза луод котьку!
Кызьы ке писпу тӧлъя
Веттаське шыпыртыса,
Асьмеос но — лэйкаса —
Веттаськом шонаськыса.
Собере чеброс гинэ
Пыдчиньы йылэ султом:
Бубыли кадь бергалом,
Сяська зынэз нысъялом!
Сэзь тылобурдо сямен —
Киосмес выретоме,
Табере ӟозъёс сямен
Туж чырткем тэтчаломе.
Султэ котыр, султэ ӝог —
Туж чырткем ортче урок.
Ӝутъялом пельпумъёсмес,
Бергатом гырпумъёсмес,
Пыдпыдэс вылын каллен
Лэйкалом на пыж сямен.
Лулскылом, кырмышъяса,
Киосмес сэзъялляса,
Ӝӧк сьӧрады пуксе ӝог —
Мукетыз кутске урок.
Лыдӟиськом но буяськом,
Бӧрысь — нош ик шутэтском!
(© Ю. Разина)
Ӵош дышетскем эше азьло быгатонме тодам уськытӥз
Ижкарысь огаз нылпи садын ужа нодъясь Людмила Витальевна Бакулева. Ми соин ӵош, соку гинэ дас классэз быдэстэм нылъёс, дышетскимы лулчеберетъя но югдытонъя училищеын (туннэ сое нимало Элькунысь лулчеберетъя колледж) — ӵош занятиослы дасяськиськом вал, ӵош киное бызьылылӥм.
Клуб ужӧнерзэ воштыса, Людмила быдэс улонзэ покчиосын ужаз. Арлыдызъя шутэтскыны яра вылэм ини но, нош со удмурт кыллы дышетыны малпам на: малы тодон-валандэ быгатон аресад ватод, согод ай?!
Анай-атайёс но шумпотыса оско солы нылпизэс: кылэз тодон пельпумез секыт уг кары, нош синазез паськытатэ, визез волятэ, ваче кусыпъёс герӟаны юрттэ.
Берыктэм физкультминутка
Нош таиз шудон нимаське «Физкультминутка». Эше куриз ӟуч кылысь берыктыны. Со вакчи гинэ, но мынам вакчи кареме ӧз поты — шудоно ке шудоно ини — ог минут ке но. Юнме шат «…-минутка» нимаське…
Нодъясь:
— Нылъёсы но пиосы, жадиллям ук синъёсты!
Жадиды-а?
Пиналъёс:
— Жа-ди-мы!
Нодъясь:
— Ойдолэ, шутэтскомы!
Ӝӧк сьӧрысь — сул-том! (пиналъёс султо)
Котырак — уч-ком: (синмынызы котыр бергато)
Бур пала, паллян пала, (йызэс буре но паллянэ берыкъяло)
Вӧлдэтэ но азьпала! (йырзэс вӧлдэт пала ӝутъяло)
Бергалом, кусӥнскылом, (огпол берытско, кык пол кусӥнско: буре но паллянэ)
Муз вылозь мыкырскылом! (азблань мыкырско, йыбырртэм сямен)
Кимес вӧл-вӧл вӧлъялом! (тылобурдо сямен суйёссэс вӧлъяло)
Выльысь ӝӧк сьӧры пуксём! (интыязы пуксё)
Выльысь тапыр тапыртом! (пукыса пыдчиньыосынызы гинэ тапырто)
Киосынымы чабом: (кичабо)
Бур пала, паллян пала, (йырзэс буре мыкыртыса, чиньыосынызы гинэ чабо — озьы ик паллян пала но)
Вӧлдэтэ но азьпала! (вылэгес ӝутыса, киосынызы чабо, собере — гадь доразы)
Табере синмес кынём но (синзэс кынё)
Учкытэк витёзь лыдӟом:
Пиналъёс:
— О-одӥг, кык, куинь, ньыль, вить!
Нодъясь:
— Лыдъямы? Синмес усьтом!
Нодъясь:
— Шутэтским?
Пиналъёс:
— Шу-тэт-ским!
Нодъясь:
— Ужалом?
Пиналъёс:
— У-жа-лом!
(© Вольный перевод с русского на удмуртский язык Юлии Разиной)
Таиз берыктэмын ӟуч кылысь — занятиос вискын шутэтсконлы тупатыса.
Пумозяз чидады ке лыдӟыны, отын мукет уроклы но «физкультминутка» шедёз.
Куд-ог «рукописьёс ӝуаса» но уг вуо — ышо!
Тодӥсько, кыӵе шугъясько нылпи садын ужасьёс выль материал яке репертуар пумысен. Эше гинэ ӧвӧл, мукет муртъёс но дырын-дырын куро монэ тазьы мае ке берыктыны яке верам темая гожтыны. Но кытчы со мынам ваньмыз ыше? Ужам ужме ас дыраз дунъяны валаськымтэ бере, ышем ини…
Егит дыръям но ӵем дыръя мар ке кылбураса гожъяно луылӥсько вал. Ваньзэ бичасал ке)))… Но — тани, вотэсбамъёс лэсьтыны луонлык кылдэм бере, ышыны сюрымтэоссэ но выльысь кылдэмъёссэ ке но ужъёсме лыдӟисьёс доры вутто ини. Оло, кинлы ке уроказ кутыны но яралоз?
Нылме вордэме бере лирика мылкыдме ӧръян понна мон трос веттан гуръёс гожъялляй, солэсь маскара верам кылъёссэ кылбуралляй (но со, нырысь кылбуръёсы сямен ик, ӟуч кылын вал — https://chitatelyu.ru «Автопортрет в стихах и прозе», со сяна Стихи точка ру сайтын но шедьтыны луэ, нош удмурт кылынэз таяз сайтын…
Мае но сое «Самиздат» амалэн ачим книга нерге карыса поттай. Кагазэз чебер вандылыны курадӟыса лэсьтылӥ но кузьым карыса кинлы но солы сётъяй. Ог-кык быртыкез библиотекае но писательёслэн огазеяськоназы вуэмын (отысь но ышымтэ ке).
Табере ини нылылэн пиез будэ. Садике ум ветлӥське бере, олокызьы но соин шудоно луиськомы: выжыкылъёс, кылбуръёс, ӝогверанъёс, кырӟанъёс, шудонъёс — юрт котырын но садын бергаку ик ваньзэ вуттӥськоно)))…
Яраз-а, ӧз-а огез ке но кылбур? Пал кылын ке но со сярысь гожтӥды ке, туж шумпото, — азьланяз тужгес мылкыд ӝутскоз выльысь мар ке малпаны!
