Юлия Разина. Ма со гужем?

Инкуазьлэн котькудӥз вакытэз — выжыкыл выллем ӧвӧл шат? Тужгес но — вордӥськем нуналэд тупам ке огаз шулдыр гужем нуналэ!

Table of Contents

Ма со гужем? Нылпиослы кылбур

Ма со гужем? — ӝужась музъем,
Сяськаосын дурсам пилем,
Инме учкись шундыберган,
Туж бер выдон но вазь сайкан.

Ма со гужем? — емыш утчан,
Пыдэ гольык сюрес кутчан,
Эбекъёсын но юшъёсын
Одӥг вуын жомбыль тэтчан.

Ма со гужем? — кырӟась вож эль,
Куараосын шудӥсь тыр тэль.
Ма со гужем? — сюрс шӧм веръян,
Трос пол упос вамен поръян.

Ма со гужем? — зорен шудон:
Зорлэсь пеган, зорез ӧтён;
Шунды азьын но вужерын
Улонэдлэсь шӧмзэ шӧдон.

Ма со гужем…

© «Кизили» журналын 2012 аре

Ку адямиос тужгес шутэтскыны ярато?

Тодӥськоды-а тӥ, Россиын улӥсьёс тужгес пӧсьтолэзе шутэтскыны ярато шуыса?

Юалляськонъёс таӵе лыдпус возьматӥллям:

26% юамъёс пӧлысь бырйиллям инвожотолэзез (июнь).
43% — гудырикошконэз (август);
46% — пӧсьтолэзез (июль).

Юнме чакламтэ вылэм ортчытыны 1980-тӥ арын 24-тӥ пӧсьтолэзьысен 3-тӥ гудырикошконозь Мускоысь Олимпиадаез. Со понна со тужгес но удалтэм вакыт: зоръёс та дыре трос уг усё, сыло шундыё шуныт нуналъёс, нош чагыр инбам — пуштрес капчи пилемо.

Вань сыӵе огин — куазез чаклась Европаысь огазеяськон (Европейская организация спутниковой метеорологии — EUMETSAT). Со быдэс дуннеысь пӧртэм интыосысь куазьлэсь югдурзэ эскерыса но ӵошатыса возе. Отысь ужасьёслэн чакламзыя, 2023-тӥ арын Музъеммы вылын пӧсьтолэзь тужгес пӧсез вылэм: 16,95 °C.

Псков, Новгород, Вологда каръёсын температура пӧсьтолэзе 20-21 градусозь гинэ ӝутскылэ, Архангельскын — 15 яке 19 градусозь, нош Нарьян-Марын — солэсь но салкымгес. Асьме понна со — туж салкым ини, малы ке шуоно, асьмелэн мылкыдмыя пӧсьтолэзь — пӧсь луыны кулэ кадь.

Но мон, кезьыт куазьлэсь кышкаськогес бере, гужем ке но Нарьян-Маре ветлысал кадь! Пичи дыръям туж яратӥсько вал «Нарьян-Мар», «Лесной олень», «Увезу тебя я в тундру» кырӟанъёсыз (ваньмыз соос пужей сярысь), нош пужеез улытозям адӟыны ӧз удалты…

Нош тӥ понна — мар со гужем?