Укмыс акроалфавитэ пӧлысь таиз — нырысетӥез. Солы туж трос ар ини: вынмуртэ пичи дыръяз яратэ вал сое вераны, монэ шумпоттыны вырыкуз. Ягулын ужакум, сое ӝогверанэз кадь лыдӟись пичи кыкто пиос но кемалась семьяё луиллям ини, шуо…
Гудыриё йӧзор
Акро-Алфавит
Алли-
Балли
Воректӥз,
Гур-р-р
Дымбыртӥз —
Етӥзмиз…
Ёрмытӥз:
Жадьытозяз
Ӝабрес
Зор
Ӟегез ӟугмаз.
— Ин-дӥняд,
Йӧзор,
Кош, кош!
Лӧбрес му
Мед
Няськалоз.
Оло,
Ӧжытак
Пилем
Раньӟытоз на,
Саклыктэм?
Тымы —
Учкы —
Чиль чиля
Ӵуж ӵогырес шундыя.
Шаерлэн шудэз
Ыра —
Эльмы
Юг-юг
Ялтыра.
© Ю. Разина. Гудыриё йӧзор. Акро-Алфавит
Гудыри дыръя чакласькон сярысь
Дорысьтыды кытчы ке мыныны дасяськиськоды ке, одно куазь сярысь синоптикъёслэсь ивортэмзэс тодэлэ: гудыри улэ уд сюре-а? Куазь гудыръяса зороно ке, оло, мукет дыръя умойгес луоз потыны?
Нош гудыри улэ сюриды ке, чакласькытэк ӧвӧл:
- Липет улэ пыроно. Укноостэс, ӧсъёстэс, муръёостэс — юртлэсь вань пасьёссэ пытсано. Антеннаослэсь, электролэсь палэнсконо.
- Урамын дыръя гудыри улэ сюриды ке, кин ке доры пырыны куриськоно, яке метрое, яке магазинэ…
- Уг яра транспорт дугдылонние но мукет кортлэсь лэсьтэм конструкциё юртъёсы ватскыны!
- Велосипедэн яке мотоциклэн мынӥськоды ке вал, дугдоно, васьконо но техникадылэсь 30 метр палэнэ — кӧс интые ватсконо.
- Машинаын мыныку гудыри улэ сюроно ке, дугдоно но укноез усьятэк пуконо, гудыри ортчытозь.
- Урамын, бусыын дыръя уг яра огназ сылӥсь писпу улэ пырыны! 30 метре палэнэ кошконо.
- Кыр интыын луиды ке, гоп, гу кадь инты шедьтоно но лапак ватсконо. Ӧвӧл ке гоп, йырдэс ватыса, пыдкупырсконо но пыд пидесъёстэс ӟыгыртоно.
- Уг яра гудыръяку вуэ пырыны — вулы матэ ик мыныны уг яра! Вуэ чилектыны быгатэ, нош ву каньыл токез келя.
- Электроюбоос, трансформаторъёс но со кадь проводъёс дорысь кыдёкегес кошконо. Напряжение возись маке котьку чилектэмез ас бордаз кыске.
- Гудыри улэ сюриды ке дэмен люкаськыса, кулэ луоз огдылэсь огды 30 метре пегӟыны.
Пиелы — веттан гур
1. Ӝужыт, ӝужыт инмысь кизилиос
Пишто азвесь сиен ворекъяса.
Ӝужыт, ӝужыт будо пичи пиос,
Адӟо ке соосты уйвӧтаса.
2. Пие но, дыр, вӧта ни та вие,
Лобе, дыр, вылӥлэсь но вылӥе.
Ӝужыт инмысь кизилиос пӧлысь
Со одӥгзэ утча, дыр, — аслэсьтыз.
3. Нош мон черетскисько, дыр, пиелы:
«Эн кельты огнамме тон кемалы!»
Акшан лысву пӧлын, дыр, сылӥсько,
Лыз синкышетэным, дыр, шонасько…
4. Пие, дыр, вазиське пальпотыса:
«Анай! Монэ тон возьма мӧзмыса!»
Нуныкае шуэ: «Берто, анай!
Тон вить монэ, кема ке но ымгай!
5. Тани, утчам кизилиме шедьто,
Тыныд сӥзем кузьымъёсын берто:
Лысву зорлэсь бичам чыртывесен,
Акшан лызэн ӝуткам синкышетэн».
6. …Ӝужыт, ӝужыт инмысь кизилиос
Пишто азвесь сиен ворекъяса.
Ӝужыт, ӝужыт будо пичи пиос,
Адӟо ке соосты уйвӧтаса.
© Ю. Разина. Веттан гур: кылдымтэ пиелы = Колыбельная — сыночку // Разина Ю. Н. Шыпыртӥсько… Кылбуръёс = Шёпотом: Стихи. — Ижевск: Удмуртия, 2013. — 112 с. (На удмуртском и русском языках). — 36—37-тӥ б.
© Авторский перевод с удмуртского языка на русский на сайте «Автопортрет в стихах и прозе» по ссылке:
