«Усе лымы, шумприч ваське лыз акшанэ — омыр напче. Мур выйисько кадь, ыштӥськисько: уг сэрттӥськы орсмем омыр. Синуӵер ӝог кыйгу пыдсы сямен мон кылисько огнам. Пеймыт. Нош ымдуры, экеяськись мускыт лымылы луыса, вӧям кадь луэ…»
Кин уг яраты кылбур чурез (вань ук сыӵеос но), соос понна кылбурме тазьы тупатӥ.
Со кылъёс ик, кадь, кудъёсыз кылбурын. Кылбурам — йӧн-йӧн рифмаез но ӧвӧл, нош радызъя тупатэм ритмика веранме ладъя:
Уломы осконэн!
Акростих
Усе лымы,
Лыз акшанэ шумприч ваське —
Омыр напче.
Мур выйисько…
Ыштӥськисько: уг сэрттӥськы
Орсмем омыр.
Синуӵер ӝог
Кыйгу пыдсы кадь пеймытэ
Огнам кыли.
Нош ымдурме
Экеяськись мускыт лымы
Нашта вӧё.
≈ 2010.
Номыр куаныкез ӧвӧл сыӵе куазен ураме огнад тупаны: аман — син азь пытсамын, сюреслэн дуръёсыз ик уг адӟисько! Тротуарлэн гожез уг луы ке, со борды канжаськыны уд шедиськы ке — йыромыны но кема ӧвӧл!
Огпол гуртэ бертай, нош изкаре берен вуыкум, сюри ӵапак сыӵе югдуре. Автобусэ пуксьыкум гинэ ай сокем уг лымыя на вал, кин ке дугдонниын сылӥсь каньылак кырӟаса но лэзиз: «У природы нет плохой погоды…» Нош автобусысь васькыкум, вамыштыны ик кышкыт ни луиз. Берло малпай: малы меда автобусэз экстренно ӧз дугдытэ? — шуныт шунтэм интыям пукысал ини лымы пельскон ортчытозь! Нош ку со ортчыны кулэ — кин тодэ? — нокинлы но ивортымтэ…
Ярам, дугдонниысен бертон сюресэ — куинь сю вамыш гинэ! «Инмаре-Кылчинэ!» — ӧтисько утисьме но вамыштӥсько дор пала, нош пель сьӧрам буйгатыса кин ке вазе кадь: «Уломы осконэн!» Со дыре ик йыры дышем сямен чота ини кылпусъёслэсь лыдзэс: «Дас кык. Акро»
© Уломы осконэн // Разина Ю. Н. Шыпыртӥсько… Кылбуръёс = Шёпотом: Стихи. — Ижевск: Удмуртия, 2013. — 112 с. (На удмуртском и русском языках). — 52-тӥ б.
