Котырдэ умоятон понна нырысь ачид шоры, пе, учконо. Та кылъёсыз мон тодӥсько туж кемалась, со кизили кадь син азям улӥз егит дырысен уно аръёс ӵоже. Визькыл со умой маке. Но сое валан понна нырысь ачид улоно вылэм…
Малы ке шуоно, визькылъя улыса но — сое мыдланес валамен йырин — янгышаны луэ…
© Юлия Разина. Уг бӧрдо гурезьёс…
Лирика
Уг бӧрдо гурезьёс, уг сэзъяло данзэс.
Ватос радын возё лул улонзэс.
Нош мон поттӥ — ӧй ват.
Кызьы «курткод жагез»
Коркад?
≈ 2010.
Огпол асме ачим юай: валало-а монэ? Малпай но шуи: уг, уг валало, кадь. Озьы, котырме воштоно кариськи — асме чакланы, лулпушме но быгатонъёсме умоятон-йылэтон бордын ужаны вунэтытэк. Собере — учкисько но — мултэс кадь мон выль котрет пӧлын. Нош ик пегӟи. Собере — валаны шуг ӧй вал сое, кин ке туж вожъяськыса учке шорам, — отысь но киыз но пыдыз вал кошкыны. Собере шӧдӥ — туж чиданы тыршо монэ таосыз, малы сокем ӟеч муртъёсыз чидатскытыса возёд? Собере…
Собере но мае ке шӧдылӥ, выльысь но выльысь лобай отчы-татчы. Но соку гинэ каньыл луиз улыны, куке та юанъёсын тунсыкъяськемысь дугдӥ. Со понна — кӧня улонэз тодоно луи! Кулэ-а вал со?
© Ю. Разина. Удмурт кылбур
© Уг бӧрдо гурезьёс… = Не плачут горы… // Разина Ю. Н. Шыпыртӥсько… Кылбуръёс = Шёпотом: Стихи. — Ижевск: Удмуртия, 2013. — 112 с. (На удмуртском и русском языках). — 51-тӥ б.
