Трос лыдӟиськись, вазь анайтэк кылем пияш, Михаил Лермонтов кычгес сямо вылэм, — шуо биографъёсыз. Но сыӵе югдур люкетымтэ солы эшъяськыны азьветлӥсь муртъёсын, кудъёсыз сое ас пӧлазы басьтыса, юрттӥллям творчествозэ пуромытыны — Г. Г. Гагарин, А. И. Герцен, А. Столыпин (Монго), А. В. Дружинин, А.И. Одоевский… Валамон ини, та нимъёс — огшоры ӧвӧл: куд-огезлэн соос пӧлысь йыръёссы эксэйлэсь но Инмарлэсь вылынгес вылӥллям, шуыны луэ. Соин но, лэся, уз валалэ шуыса, Михаил Юрьевич «Ангелзэ» шокарысь редакцие уг сёты, эшъёсызлэн синъёссылэсь палэнынгес — Одессаын печатла.
© Перевод на удмуртский язык Юлии Разиной
Михаил Лермонтов. К друзьям
Эшъёсылы
Удмурт кылэ берыктӥз Ю. Разина
Вордскеме сыӵе: мон – тыл кадь.
Эшъёсын дэмен – майбыр!
Жаль ӧвӧл куддыр, пичи но, –
Юыса ортче ке дыр.
Дан понна улэм уг поты.
Яратон шунтэ вирме.
Со сяна жингрес сиос но
Тулкыме вутто лулме.
Нош куд-ог дыръя уг луы
Юмшанлы тупась мылкыд:
Шуак мур малпан вуэ но,
Сюлэмме зӥбе кекыт.
2012
© Юлия Разина: берыктэмын ӟуч кылысь
Михаил Лермонтов, кызьы пусйимы вал ини, эшъёстэк ӧз улы. Кӧняез ке сярысь гинэ вералом татын.
Александр Иванович Герценэн (1812–1870) соос ваче син тодмо вылӥллямтэ, но Герцен Лермонтовез туж вылӥ дунъяса, сое аслаз эшез шуэ вылэм, солэсь творчествозэ вылӥ дунъясь статьяос потталлям.
Со матысь эшъяськем Святослав Афанасьевич Раевскиен (1808–1876). 1836 арын ӵош пуксиллям гожтыны роман («Княгиня Лиговская»). 1837 аре, тулыспалэ, Раевский юрттэм Лермонтовлы «Смерть поэта» кылбурзэ лыдӟисьёс пӧлы вӧлмытыны (тодӥськоды, со кылбур сӥземын А. С. Пушкинлэн быремезлы). Ог толэзьлы соку Раевскиез пукто гауптвахтае, келяло ссылкае Олонецкой губерние «для употребления на службу, по усмотрению тамошнего гражданского губернатора» шуыса. Отын со нырысетӥ «Олонецкие губернские ведомости» газет поттэ. 8 куартолэзе 1839 аре Раевскиез выжто Кавказ ссылкае, аслаз куриськемезъя ссылкалэсь мозмыто 1840 аре гинэ. Собере со потоз отставкае но 1876 арозь улоз аслаз именияз, Пенза губерниын.
«Монго» нимо эшез Лермонтовлэн — Алексей Аркадьевич Столыпин (1816–1858) — солы ӵыжы-выжы вылэм — двоюродной агаез (кык арлы солэсь егитгес ке но). Царской Селоын соос ӵош ветло вылэм «кружок шестнадцати» огазеяськонэ. Малая Чечняе но экспедициен ӵош ветлӥллям. Михаил Лермонтов Н. С. Мартыновен дуэльын эчешыкузы Столыпин эшезлэн лушкем секундантэз вылэм.
Матысь эшъяськем Михаил егит дыръяз Владимир Александрович Шеншинэн (1814–1872) — «К другу В.Ш.» (1831) нимо нимысьтыз сӥзем кылбурез но вань.
Эшъяськем Лермонтов суредасен Григорий Григорьевич Гагаринэн (1810–1893). Та художник трос суредам Кавказ улонэз, со вакыт ортчись ожмаськонъёсыз. В 1840 аре соос ӵошен кылдытъяллям кӧня ке акварель суред.
Алексей Александрович Лопухин но (1813–1872) вылэм Лермонтовлэн туж оскымон эшез. Москва дырысен, куке 1828 арын Миша Лермонтов ӵужанаеныз Малой Молчановкае улыны лыкто, Лопухинъёсын бускель луо.
© Юлия Разина.
