Гожъям текстъёс (проза-а со, кылбур, закон, инструкция но мукет — ваньмыз) одӥг кылысь мукет кылэ берыкъяны кутскемын ини вашкала дырысен.
Нырысетӥ берыктэм произведение
Сыӵе текстэн лыдъяло кыксэ:
- одӥгъёсыз тодосчиос шуо: Шумерысь «Поэма о Гильгамеше» (Месопотамия — шумер кылысь берыктэмын азиат кылъёсы — аккад, хуррит но хетт);
- нош мукетъёсызлэн шуэмзы потэ: Ветхий Завет (Александрияын берыктэмын еврей кылысь грек кылэ).
- Но вань на куинетӥ версия но. Китайын лыдъяло нырысетӥ дунневыл берыктэмен Буддалэсь тодонзэ, кудзэ Индиысь монахъёс пали кылысь берыкъяллям китай кылэ, берло ини мукет кылъёсы но вӧлмытон понна.
Россиысь нырысетӥ берыкъясьёс
Азьло берыктэм произведениез «берыктэм» шуыса уг верало вылэм. XIX даурлэн нырысетӥ палараз берыктэм уж оригинал шуыса лыдъяське вылэм. Озьыен, асьме туала кылын верано ке, Жуковский, Пушкин, Лермонтов но мукет берыкъясьёс «асэстылӥллям» муртъёслэсь текстъёссэс.
Россиын нырысетӥ берыкъясь лыдъяське Василий Андреевич Жуковский. Нырысь со англи кылбурчилэсь — Грейлэсь «Черкогурт шайзэ» («Сельское кладбище») берыктэм. Солы луыса ик ӟуч лыдӟисьёс тодматскиллям Гётелэн, Шиллерлэн, Байронлэн, В. Скоттлэн но Гримм агай-вынъёслэн творчествоосынызы.
