Та кылбур нырысь вордӥськиз ӟуч кылын (Акростих «Всё получится», 2009). Со вакытэ мон улӥ Дэри ёросысь Ягул гуртын, ужай отысь клубын но крезьгуръя нылпи школаын.
Нош 2016-тӥ аре сое берыктон дыр вуытозь, сизьым пол ужме вошъяй: УдГУлэн Философия кафедраяз но, Удмурт филология институтаз но, Москваысь МФЮА университетын но ужаса вуи. Выльысь УдГУэ берыктӥськеме бере, тодон-быгатонме маин ке выленыз тырмытон понна, магистратурае пыри, Т. И. Зайцевалэн (удмурт филологияя докторлэн) ӝуткамез но кивалтэмез улсын нылпи писательлэн Г. А. Ходыревлэн творчествоезъя диссертация гожтон сярысь малпанэ кисьмаз).
Ю. Разина. Анаелэн кырӟанэз
Лирика
Ваньзэ сое, мар лулме шугмытэ,
Котьку но мон крезьгурен кисьтӥсько,
Бинялскисько бышкиськись шобретэ,
Анаелэсь кырӟанзэ мытӥсько…
Мур малпасько мон солэсь верамзэ,
Сьöд инвислэсь льöльмонзэ возьмаса:
– Уӵыпие тон мынам, чирдӥсе,
Ӝож ке но, шуг ке но, ул – кырӟаса…
Выльысь соку ӝуткасько бурдъёсме,
Лумбыт, шунды сямен, пальпотӥсько:
– Эн куректы, гань-гань изь, мусое,
Мон верамдэ сюлэмам возисько!
2016.
Туспуктэм вылын: ымныры кöсыт, туж восьмемын вал мон та фотое сюрыкум. Но висёнэ тодмо öй вал на, йыры кыскаса ветлӥ ини ке но…
2021-тӥ арысь выжыку, Выль ар вуон вакыт каникулэ нылы туспуктон сессияз сьöраз öтиз: пичи дырме тодам уськытӥз…
Гуртын улыкумы, папае бакча сьöрысь нюлэскысь кыз вае но, ми, нылпиос, куатланыса сое чебермаськом ни вал! Малы ке асьме коже öвöл — бускель ныл но юрттэ вал буёло кагазлэсь лякылэм жильыосмес но мамык чеберманъёсмес ошылыны.
Нош мамае тöдьы басма вылын яркыт пужъятскемъёссэ поттаса, борддоръёсы, валесъёс котыре, ӧс янакъёсы, укноосы ошылоз но — корка огак югдытскоз вал! «Выжыкылэ вуэм кадь луылӥ» шуи ке — номыр уг вера, дыр. «Сопал дуннеез адӟи» шуисьёслэн кылзы тупагес та югдурлы: сокем югыт но шулдыр луэ вал мамаелэн котырыз…
Оригиналэз удалтэмынгес, кадь — ӟуч кылын лэсьтэм сайтам:
