Котькуд адямилэн верамез потэ кинлы ке но аслэсьтыз сюлмаськонъёссэ. Кызьы сотэк — со сюлмын вордскем, лул улонэз шараясь кылъёс ук; нош кыл — адямиен адямиез, калыкъёсыз герӟась амал! Мар веранэз ини кылбурчи сярысь! Солэн кыре куриськись кылъёсыз огшоры ӧвӧл — со возьматэ адямилэсь мылкыдзэ сутӥсь, радъям яке кырӟась чуръёс пыр. Малпамтэ шорысь малпаськись каре аслэсьтыз лыдӟисьёссэ. Соин ик котькуд кылбур — лулскыса шокчем сяна, — вордэм кыл. Арбери но ӧвӧл, улэп — кузёезлэн (кылбурасьлэн) тодаз покчи эш яке нуны чотын улэ. Соин ик ачиз кылбурчи сюлмаськоно луэ: тузонӟыса ӝажыосын медаз кылле вордэм чуръёсыз.
Со сярысь Марина Ивановналэн таиз кылбурез. Аслаз верамезъя, со ачиз ӧз гожъя — кин ке солэн киыныз валтӥз кадь…
© Перевод на удмуртский язык Юлии Разиной
© Марина Цветаева. Моим стихам, написанным так рано… Оригинал на картинке:
Вазен ини гожтэм чуръёсылэн но…
Удмурт кылэ берыктӥз Ю. Разина
Вазен ини гожтэм чуръёсылэн но,
(Ку ӧй на шӧд асме кылбурчиен),
Шӧдтэк шорысь улӟем фонтанъёслэн-а
Пазьгиськемзы сямен,
Черке сюрем пичи шаянъёслэн-а
Ӵаш поттыса бызьылэмзы выллем,
Кулон сярысь егит визьмын гожъям ай
Азьвыл чуръёсылэн,
Нокин но лыдӟытэк, лавкаосын далай
Тузон пӧлын кыллись чуръёсылэн,
Кема возем дуно винаослэн кадь, –
Дырзы вуоз пумен!
2013.
© Юлия Разина: берыктэмын ӟуч кылысь
© «Удмурт дунне» газетэ куремзы вал 2022-тӥ арын, уг тодӥськы, поттӥзы меда…
Аналитика ортчытъясь вотэсбамъёс лыдъяллям: 2025 арозь югыт дуннеез адӟизы Марина Цветаевалэн 260 изданиосыз. Соос пӧлын:
- 186 книгаез,
- 11 огазе люкам произведениосыз.
Трос-а, ӧжыт-а со? Ӵошатон понна учком, Книгогид, Литмир, Фантлаб, Лайвлиб, Лайбербук, Майбук, М.ок, Бэбиблог сайтъёслэн ивортэмзыя, кинлэн кӧня книгаез потэмын 2025-тӥ арозь, шуом:
- Самуил Маршаклэн — 1711;
- Сергей Михалковлэн — 1499;
- Михаил Лермонтовлэн — 1347;
- Владимир Маяковскийлэн — 854;
- Анна Ахматовалэн — 460;
- Агния Бартолэн — 352;
- Сергей Есенинлэн — 306;
- Осип Мандельштамлэн — 279;
- Александр Твардовскийлэн — 262;
- Владимир Высоцкийлэн — 249;
- Евгений Евтушенколэн — 228;
- Афанасий Фетлэн — 216;
- Николай Гумилевлэн — 173;
- Елена Блаватскаялэн — 151 яке 279;
- Роберт Рождественскийлэн — 126;
- Булат Окуджавалэн — 124;
- Николай Заболоцкийлэн — 123;
- Андрей Вознесенскийлэн — 111;
- Георгий Ладонщиковлэн — 67;
-
Александр Блоклэн — 60;
- Андрея Дементьевлэн — 50-лэсь ятыр;
- Расул Гамзатовлэн — 38;
- Константин Бальмонтлэн — 35;
- Белла Ахмадулиналэн — 33;
- Римма Казаковалэн — 30 пала;
Нош Г. Р. Державинлэсь, А. С. Пушкинлэсь, Н.А. Некрасовлэсь, Б. Л.Пастернаклэсь, Ф. И. Тютчевлэсь, А. Н. Майковлэсь, В. В. Хлебниковлэсь, Ю. В. Друниналэсь, Николай Рубцовлэсь — кӧня бичет произведение поттэмэс — лыдъяллямтэ на.
Ма веранэз, татын ваньмыз кылбурчиос сярысь верамын ӧвӧл, тужгес син азе сюрисьсэ гинэ быръеме потӥз. Син азе пичияк суред кылдытон понна.
