Кылбурчи Максим Печерник паймытӥз монэ одӥг кыӵе ке темаысь троспӧртэмлыко суредъёс син азе поттыны устоеныз. Ӵем дыръя со гожъя хокку амалэн, шергес — танкаен. Азьланяз мон тыршо ай поттыны соизэ но. Нош туннэ — огшоры куинь вамышъем ямбен катрен (ньыльчурен). Но матысь дыре поттэме потэ солэсь «Мелодиязэ». Али сое берыктыны вырисько. Япон кылбуретысь кабъя гожъямзэ — берлогес ини.
Перевод на удмуртский язык Юлии Разиной
Максим Печерник. Песня о песне
Кырӟан сярысь кырӟан
Удмурт кылэ берыктӥз Ю. Разина
… Лыктэ кырӟан, кошке,
Ачиз нош вунэтэ,
Кулэ-а вал мар ке,
Ӧтиз-а кытчы ке…
Майбыр солы ӵошен
Кошкись уен-`налэн,
Вазьгес сактӥсь куазен,
Муртась гудыриен.
Арган бирды улысь
Куара кадь дась ышын,
Кылэз – шӧдтэк шорысь –
Каре туж кельышлы!
Куашка я юскиське,
Азвесьвуам луэ…
Уд вала, ку кутске,
Ку – быронэз вуэ…
…Кырӟаськомы дэмен,
Лымы чильпам сямен.
© Юлия Разина: берыктэмын ӟуч кылысь
Мар гурен меда туннэ кырӟасалмы?
Нош кемалась ӧвӧл монэ паймытӥз одӥг муртлэн юанэз: «Марлы асьме адямиос гожъясько пӧртэм калыкъёслэн жанръёссыя, мар сётэ со йӧскалык поэзиямылы?»
Валаны кулэ, дыр, тани мае: адями ассэ утча пӧртэм удысъёсын. Шуом, ужан ӧнер бырйыкуз, со аслэсьтыз быгатонзэ но, мылкыдзэ но лыдэ басьтэ. Угось, янгышаз ке — ужез но, улонэз но уз пӧрмы, маиз ке но ышем кадь луоз…
Мукет ласянь, пӧртэм адямиослы пӧртэм жанрен гожъяськон со огшоры эсэп, огшоры норма — кинлы мар тупа. Мылкыдзэс усьтон но кисьтон понна, ваньзы огкадь гожъяськысалзы ке, лыдӟисьёслэн синзы но йырзы туж шаплы жадьысалзы, малы ке шуоно, висъетъёстэк оглом маке — со синсузёнтэм, соин ик — мӧзмыт, тустэм-буйтэм, огвыллем.
Собере, дуннелэсь борддораськыса, со-та асьмелэн ӧвӧл шуыса улыкумы ик улон азьланьске: озьы кинлэсь ке яке марлэсь ке бере кыльыны но кема ӧвӧл. Тодады вае ай, «туала» катренэн гожъяськон но лыктэмын ук французъёс пыр вашкалаысь — грекъёслэсь но римлянъёслэсь. Соку но «со милям ӧвӧл» шуыса улысалмы ке, мар гурен меда туннэ кырӟасалмы?
